المشهد الأول
[جـــرح الثمــان سنيـــن]
على الموعد بلهفه جيت لامانع ولاتأخير
لفيت من العصر هايم مع أن الموعد المغرب
وجتني بس انا مدري شعرت الجيه هذي غير
وهي تقرب من عيوني شعرت أن الممات أقرب
وقلت: الله يهونها عسى في جيتك. .لي خير
أنا من شفتك أقبلتي وأنا خايف ومستغرب
على كثر الحكي مدري كأنه خانها التعبير
قالت لي جمل وأشياء لاتكتب ولاتعرب
هدت فجأه تطالعني وانا في حاجة التفسير
لجل نحكي بهدوء أكثر سألت
الحلوه: وش تشرب
فصاحت بي(أنا أحبك) ولك في هالحشا تقدير
وتدري ان المثل فينا وفي أحساسنا يضرب
صحيح أنك وفي وانك بري من تهمة التقصير
ولكن ذي عوايدهم من أيام وزمن يثرب
تكون البنت لابن العم ورغبات الكبار تصير
وتدري الأقربون اولى مع أنك للخفوق أقرب
وتدري للقدر كلمه ولعادات الأهل تأثير
لذا أرجوك تتركني وانا من دنيتك باهرب
شعرت بحكيها كنه قصاص وأمر بالتعزير
شعرت الدنيا ضاقت بي من المشرق ليا المغرب
مشت خلت وراها طفل مايدرك وش التدبير
يحسب ان الغرام أشعار شاعر
وأغنية مطرب
ضحكت وماقدرت أني الاقي لضحكتي تبرير
من اللي بوقتنا مره ضحك من لدغة العقرب
رفضت أستوعب اللي صار ولا أستسلمت للتغيير
ثمان سنين اجي نفس المكان بحزة المغرب
برغم ان الثمان سنين جرح وكلفتني كثير
انا لليوم اجي وادعي تجي يارب تجي يارب
ــــــــــــــــــــــــــــ
المشهـــــد الثاني
[الأنهيـــــار]
بعد فتره من غيابك ليه بالله أتصلتي؟
من ثلاث شهور شاللي رجعك يعني وصار
ما أنتي عشتي كل هالفتره ولاحتى سألتي
وش حصل هالحين؟ قولي وعلميني باختصار
ليه؟ دام انك رجعتي اليوم ليه اصلآ رحلتي
يعني الدعوه بكيفك أومزاجية صغار
الا يمكن صار لك حاجه بعقلك وأنهبلتي
وانقلب وضع العلاقه من علوه لانحدار
ولا ماصدقتي اني أعشقك حتى ثقلتي
أو كلام الليل فعلآ معك يمحيه النهار
يوم قررتي بليا سابق انذار أعتزلتي
جاحدتني كن مالي دور في صنع القرار
وادري انك لاصملتي في قراراتك صملتي
ماتردك دمعتين وكسر خاطر واعتذار
أحتملت اللي لو انك في مكاني ماأحتملتي
ووالله لولا اني عرفتك ماعرفت الأنهيار
إنكسار وضيق صدر ومشكله لامن زعلتي
وان رضيتي فالمصيبه ضيق صدر وانكسار
ضعت مدري ويش اسوي فيك
لكنك وصلتي
مرحله خلتني أنسى كبريائي والوقار
صدقيني لوفعلتي في حياتي مافعلتي
مابيدي غير أحبك وأعشقك أكثر وأغار
يكذب اللي قال عندي ما
طلعتي ولانزلتي
واعتبارك في عيوني مايجازيه أي اعتبار
أنتي أصلآ من وطيتي في مساحتي وحللتي
صرت أحس اني مساحه من بياض ومن خضار
مثل الأسطوره واضنك من خلال اسمي دخلتي
صفحه التاريخ لكن كنتي أسطورة دمار
مجرمة حب وقتلتيني لو انك ماقتلتي
يكفي اني قمت أحس برغبتي في الأنتحار
كلما أذكر كلامك لي على الجوال قلتي:
كل واحد في طريقه لي مسار ولك مسار
أذكر اني كنت ساكت وقتها حتي قفلتي:
واختنقت ومادريت الا وانا افك الزرار
والقط أنفاسي وانا أسال ليه ياروحي فشلتي؟
كانت اول تجربه معقول اسأت الأختيار
أفترقنا وأعتقد من بعد فرقاي أنشغلتي
وأفتكرتيني بعد ماجار وقتك وأستدار
أتصلتي تسأليني:كيف حالك؟
بوأنتشلتي
جثتي من قبل اموت من القهر
والإنتظار
أيه انا في خير لكن ودي أعرف ويش نلتي؟
من سواتك لاضربتي بعشرتي عرض الجدار
إنفصلتي واستقريتي لحالك وانتقلتي
طالعه وبرغبتك من دار واصبحتي بدار
بس انا في نار عشت وتهت من يومك رحلتي
حتي في لحظه كتابة هالقصيده عشت نار
عندما غبتي ثلاث شهور ماحتى سألتي
قلت: أجل آن الأوان ويفترض سدل الستار
وقبل لاأغمض عيوني وبثواني أتصلتي
لجل تنعاد الحكايه وكن مابه شي صار
ــــــــــــــــــــــــــ
المشهد الثالث
فــي صبـــاح العيـــــد
على كثر أتصالات الخلايق في صباح العيد
انا والله ماكنت آتحرى غير جوالك
تحريت أتصالك انت يالغالي وبالتحديد
لأن العيد ماأظنه يجي وماجيت
في بالك
تصور كيف مر العيد من تنكيد
في تنكيد
وانا ماغير أهوجس بك وانادي
وآتحرالك
وجوالي غدى مثلي تنهد واكثر التنهيد
يقول:ابطى عليك وقلت: أكيد العله أرسالك
وقمت اكذب على نفسي واقول بصيغه التأكيد
أكيد الحين بتكلم وانا أدري ماطرينالك
على مايبدو أني كنت عن بالك بعيد بعيد
حرام ارجوك صدقني أنا ماأستاهل أفعالك
أناملكك وانا والله على ماتشتهي وتريد
أنا وياك تعرفنا كما المملوك والمالك
كأني منخلق بعد العباده وغاية التوحيد
عشان أعيش من شانك وشان رضاك وأحيالك
أنا رهن أصبعك أشر ومن هالإيد إلى هالإيد
علي كل أعتباراتي أنا طفلك ورجالك
واذا غايتك تذبحني فما انت بحروة التأييد
توكل وانت تلقاني متى ماتنوي أقبالك
ولكن لاتعودني على الفرقا ونار البيد
أنا عايش على خبرك نعيم وجنة وصالك
جفاك اليوم قيدني تعال وفك هذا القيد
كلمني وعايدني وقلي إنت وش حالك
ياليت العذر
"فاتــــــــوره"
عليك بحاجة التسديد
أخاف العذر هي قولة
"نسيته رقم جوالك"
ــــــــــــــــــــــــــ
المشــهــد الرابــــــع
النصـيــــــــب
أبد ماجيت ابارك ولكن جيت باوصيك
علي اللي ناوي تدخل بها الليله معذبتي
ترى لولا الظروف اللي عطتك وحدت محاكيك
قسم بالله ماتدخل عليها لو على رقبتي
ولكن النصيب اقوى ولاأدري ويش اسوي فيك
نعم صارت معزبتك ولاصارت معزبتي
كذا شاءت بنا الأقدار تحرمني لجل تعطيك
كذا لازم عشان تفوز إنت و أخسر بتجربتي
تراها غاليه جدآ وتكفى والله يخليك
تدللها تدلعها تنسيها مصاحبتي
أنا من كثر ماأغليها أحس أني بديت أغليك
ولاتسأل بأية حق؟ ولا وش مناسبتي؟
لأنك لوبتسألني بتسمع شئ مايرضيك
لذا ياخوي لاتسأل ولاتسمع لأجوبتي
أبيك تحطها في داخل عيونك وبين أيديك
وهي دلوعه اعتادت على كثرة مداعبتي
فداعبها شوي شوي حتى تشتهي طاريك
وشاغبها إلين تقول لك: بطل مشاغبتي
واذا هي مالها خلقك ولاتضحك
ولاتسليك
تحملها وإسألها: ياعمري ليه عصبتي
وبالك اسمع انك يوم تضربها وهي تشكيك
مايحتاج اوري لك بفن الضرب موهبتي
صحيح انك بتملكها ومعك العقد بالتمليك
وانا عارف حدود الله ومن حقك معاقبتي
ولكن قلها المجنون وصاني وهو يعنيك
يقول انه بينتظرك ولو شيب وشيبتي
وانا مجنونها اللي مانساها وأنت مايمديك
تغطي ذكرياتي في هواها وربع تجربتي
أحس اني تماديت بكلامي والغضب حاديك
لو أنك في مكاني ماتفكر في محاسبتي
كفاك أني تركت الليله اشغالي
عشان أجيك
دخلت القاعه برجلي ولاأدري ويش عاقبتي
وانا ماجيت اخرب عرسك الليله ولاأذيك
أنا جيتك عشان أخاطبك واسمع
مخاطبتي
توصى و أنتبه و أحرص عليها والله يهنيك
ترى كل الكلام اللي طلع من ضيقتي وكبتي
ولكن ماقدرت اني أقوله وانت مايخفيك
أخاف اني إذا قلته تقوم
وتقـــطـــــــع
رقبـــــــتـــــــي
@توقيع الشاعر@
محمـــد الشــهــري
..الخبر..
مناسبتها:-
يحب له وحده من سنه وبالأخير تزوجت صديقه..
وهذي المشاهد الأربعه كانت القصه وهو كتبها على شكل قصيده...
الإثنين 28 يناير 2008, 3:24 am
